Anei rā te kairangahau e takahi nei i te huarahi kua horahia mai e rātau mā kia uru tomo mai wērāka momo āhuatanga ki roto i tēneki tuhinga roa, ‘mai i te puna ki te puna, me kī, ‘mai i ngā tīpuna, ki ngā mokopuna,’ e hono pū ana ki taku kaupapa rangahau ‘Mai te whēkerekere o te pō, ki te whēkitekite o te ao.’ Kua hōrapa kēhia mai ngā tauiratanga me te huarahi e ngā mātua tīpuna o tuawhakarere hai whai mā tātau. Kia āta whakakauhia te iho o te kaupapa ki tōna tiketiketanga me tōna hōhonutanga, ka whakaataatahia mā roto mai i te waiata e whai atu nei, ngā taonga tuku iho o te mātauranga. Ko te ingoa o te waiata nei ko ‘Ngā kete o te Wānanga.’ Koineki te waiata i titohia e te kairangahau rāua ko (Gardner, 2008), hai taonga mā Te Whare Wānanga o Awanuiārangi, ka mutu, i āta haurapahia e māua ngā kupu hai taonga taurangi, taonga tāpuhipuhi mā ngā akonga i roto i ngā hōtaka katoa o Te Whare Wānanga o Awanuiārangi, e waiata tonuhia nei i tēneki wā i waenganui i ngā mahi ahurea a te Wānanga.