Nga whakaaro o te kaituhi:
Hai tēnei whakapuakinga ūpoko, ka whai waahi ki ngā kōrero kua roa tonu au e whakaaroaro ana, memea me whāki e au, me pupuri noa rānei. Ko aua mamae hoki, kua roa e noho huna ana, kua roa e takahuri haere i roto i au. Nō nā tata tonu nei kua tapapa kau ana te mamae me taku mōhio ki tēnei tikanga. Ā, kua mauri tau, he mahi tonu tā te mauri tau nā reira ka tukuna aia ki tāna e hiahia ai, ki te whakaara ake. Rokohanga atu, i te mea ka purita tēnei tuhinga whakapae i roto i ngā whare pukapuka o Te Whare Wānanga o Te Awanuiārangi rāua Ko Te Aho a Māui, kua whai wāhi a tangata kē, ā iwi kē, ki ēnei kōrero. Heoi anō rā, me pēnei te kōrero. Ko te take i mauri tau ai a whakaaro kia matapakihia te kōrero he mōhio nōku he pono he tika ēnei pūrakau kōrero. Me kī pēnei, ko ngā kaiwhakauru tē taea te waihanga kōrero anō nei he mahi noa iho tēnei, e hē. Ā kāti ake rā koinei e hora nei. Āe marika me tuku atu i ngā pūrākau kōrero o tō mātau huia kaimanawa ki āna pia ka tika! Mā te mōhio ki ngā āhuatanga, ngā wheako ka pā ki te tangata nōna e pakeke haere ana, e tāraihia ana ōna ake tikanga whakaaro hai tiaki i tana noho i te ao. Ko ōna mōhio ki te reo Māori me ngā tikanga kua whāngaihia e te momo pēnei i a Kui ka titia rawatia ki te ngākau, mā reira e mōhio ai te pia he aha te aha, nō hea tērā tikanga, nā wai i tapa tērā whare, ko wai rā te kaitito waiata, mō ngā uri haere ake nei haere ake nei.