Ko tēnei tuhinga paerua, he tuhinga kikokiko, he tuhinga wairua hoki e mau ana ki te hā o ngā tūpuna me ngā uri hakatupu o te marae o Matawaia, kia puta a pūrangiaho ki te hawaiikitanga
o ngā whakaaro, “Ko Matawaia te iho matua o tōku tuakiritangata”. Ko roto ake nei, ka āta wetewete, ka arohaehae, ka matawaitia ngā ranga whenua me ngā nuka tāngata hei whakakaha ake i te hokinga mai, me te noho āhuru o ngā uri o Matawaia ki te mata o te whenua, tāe rawa ki te papatipu o te marae. E ai ki aku mātua tūpuna, kia tū pakari te tangata, tuatahi me mōhio ia ki tōna tuakiritangata, arā, ki tōna tūāpapa, i anga mai ia i hea, kātahi ka maungārongo tōna noho ki te mata o te whenua. Ā tōna wā, whārōrō pai ōna parirau ki ngā mahi katoa o āpōpō. Koia pūmau nei te pokapū o taku tuhinga paerua, he whakaemiemi i ngā mātauranga, ngā hītori, ngā tikanga, ngā kōrero ā-whānau, me ngā kōrero tuku iho e pā ana ki to mātou marae o Matawaia, me te hiahia, kia tāngia ki te kiri a Tānemāhuta, e oti mai tētahi pukapuka te hanga. Mai i taku taitamarikitanga, ki taku taipakeketanga, kua kitea au i te mimiti haere o ngā puna kōrero kei runga i ō mātou marae, nā konā te whakaaro ka hihiri ki roto i ahau, ka pēhea ake ngā uri hakatupu? Mā wai rātou e ārahi ki ngā rētōtanga o te wā kāinga? Kia ahaia? Kia whakakitea e ngā rārangi tuhituhi o runga ake nei, mo te maungārongo o te noho, me te pakari o te tū ki te mata o te whenua, ki runga hoki i te marae e kīia nei, ko ngā whatitoka ki te ao tūroa, ka puta ngā tino akoranga o rātou mā. (Kākā, 2018) Mā roto i ngā tuhituhinga, ka herea te mauri me te wairua o ngā kaiuru, kia māturu iho ki o rātou mokopuna. Hei konei whakamau ai te mita ake o Matawaia, hei whakarerenga iho ki ngā reanga ā ngā tau ka hori. Nā reira tēnei rangahau, he whakaringaringa tonu i ngā wawata me ngā tūmanako o rātou mā, kia kaua e rite ēnei tāonga ki te kēwai e noho korehāhā nei.