I a au e tamariki ana ia Rātapu haere ai mātau ki te marae. E iwa tau taku pakeke i tēra wā, he tākaro te mahi. he haka,he waiata hoki te mahi. Muia ana te marae i tērā wā, muia ana e ngā mātua, e ngā kōka i runga i te whakaaro kotahi o tētahi oku tungāne o Tamati Tuhura me te moemoeā ōna mō tō māua kuia mō Pahemata Ānaru. Nāna ko tewhakatinanatanga mai o tō mātau wharenui, to mātau whare tipuna a Te Rauhina. E rua nga ingoa kārangaranga mō tēnei kāinga. Ko Ngamotu tētahi ingoa, ā, ko Kihitu hoki tētahi ingoa. Ko tō mātau whare tipuna kai Ngamotu. He poraka whenua a Ngamotu āhua rima mineti mā runga motukā mai i Wairoa. Ko Kihitu tētahi pātiki e anga atu ai ki te marae. He rori pūehuehu, he rori kōpikopiko e tae atu ai ki Ngamotu, ki Kihitu. Nā reira ko te kaupapa nui i tēra wā, ko te ako waiata e pā ana ki a mātau anō, me te pōhiri i ngā manuhiri ka takahia mai ngā rori ki tō mātau marae, kia kite ai rātau i ngā mahi tukutuku, i ngā mahi kōwhaiwhai. He kohinga waiata, he hokinga mahara ki te wā i a kauheke mā, ki tētahi wā e ora pai ana te pae kōrero me te pae karanga e mumura mai ana tō mātau hapū. Ko ngā tuhinga kōrero kai roto, he hoki whakamuri te titiro ki ngā tau waru tekau me ngā momo waiata i titoa mai aku pakeke. Ko whakarongo ake ki te reo tētahi o aua waiata rā. Koinei tētahi o ngā waiata e toru ka āta tātarihia e au. I tīkina atu ai koirā hai ingoa mo taku kaupapa rangahau, na kai roto i ngā kupu iti nei te nui o ōna āhuatanga. Te ngāwari noa iho o nga waiata i titoa i tērā wā.
Nā ēnei āhuatanga katoa i tau ai ko taku kaupapa, he mea whakaora, he mea whakahou hoki i ngā kōrero mā roto mai i ngā waiata. Ngā waiata i ahu mai i ngā hapu o Ngamotu, te pā o Te Rauhina.