Ngā kōrero o te kaituhi
Mai tōku whakaritoritotanga i tau taku aro ki te tangi o te pere o Te Hāhi Ringatū ki te taha katau o taku tipuna whare o Toikarau, e tū mai rā i te marae o Waikirikiri te pā ātea o taku hapū a Hāmua . Ko rongo taku wairua ite ihi, i te tapu o ngaihoiho o tuawhakarere. Rere ana te mataku. Ko te wairua o ngā pakeke he rerekē , te reo o ngā pakeke, he rerekē , ka rongo tonu koe i te tapu me te mataku. Te āhua i mua i tō kuhu hanga ki te whare tipuna ki ngā kaupapa o te hāhi mai te noa ki roto i te tapu, ka rongo tonu koe i taua wairua. I reira te tiktiketanga o te uru māraurau ki ngā tīpare o ngā kurahuna o nehe, o kura tawhito mā . Tēnei au te hōkai nei i ngā tapuwae o tōku matua kia ūhia au ki te kākahu o te whakapono o ngā tamariki o Ihaira i tauawhitia ai au ki ngā karakia, ki ngā inoi, ki ngca hīmene , ki ngā pānui , ki ngā waiata, ki ngā whatauki i rongo ake, i kawea ake te wairua o te kupu. Kia mārama tonu te titiro ki te hōhonutanga me te tino o ngā kupu mōteatea e tuwhera ai tō ngākau ki ngā tohu o te ao. Ka nui hoki taku aroha ki taku Hāhi Ringatū.