Ko te whakamana i te tipu o te mokopuna te kaupapa matua o tēnei rangahau. E whakawhāiti ana te titiro ki te kaupapa o te Kōhanga Reo, me ōna tikanga whakahaere hei tūāpapa mō tēnei rangahau. Ko te Kōhanga Reo, tētahi o ngā huarahi e whaia nei i ngā tikanga o te ao Māori, hei whakaora i te reo Māori me ōna tikanga. E kī ana te korero, “I ahu mai ngā tikanga o te Kōhanga Reo i te marae, nā reira, me marae tōna āhua”. 1 Ki tā McFarland, mai i te tikanga, ka puta ko te ture2, nā reira, ko te tikanga e hāpai ake nei, ko te whakatipuranga o te mokopuna. Ko ngā hekenga o te tikanga, e ruku atu ana ki ngā ture Māori me te ture a te Kāwanatanga e tāmia nei i te mahi a te Maori i mīmiti haere ai ngā tikanga whakatipu tamariki. Mai i te taura here tangata ki te ture here tangata, ka tīhei mauri … I te whānautanga mai o te tamaiti, ka tapahia te taurahere o te tamaiti, te herenga ki tōna whaea, ki tōna whare tuatahi, ā, ka herehia anō rā te tamaiti ki te aroha o tōna whānau. Ko te hā tuatahi, e tā ngi atu ki te ao, e i! kua tae mai ahau, ka tīhei mauri ora! I tērā wā tonu, ka ātawhaitia e te whānau i te tipuranga o te taonga nei, kia whaiōranga ia i tēnei ao, kia maia ia ki āna mahi kātoa, kia pono ia ki ā ia anō. Ko ngā ture Māori hei ātawhai i te tipuranga o te tamaiti, i heke mai i ngā tauira a ngā mātua tīpuna. Ko te oriori, ko te mōteatea, ko te pūrākau, ko te pepeha me te reo pākihi ā te whanau, ngā mauhana hei whakakotahi i te hā o te tīpuna me te mokopuna. Ko ēnei reo katoa te hāmano, hei hiki i te mauri o te tamaiti kia tipu, kia ora ki roto i tōna ao. Ko te whakatinanatanga ō ēnei reo, e whakatauira ana i te tikanga me ōna ture hei manaaki i te oranga o te whānau. I te taenga mai o tauiwi ki Aotearoa, i kitea te pākaha o tō rātou whakapono, me ō rātou ture i tāmia ai te reo a te Māori me ōna tikanga. E rangona tonu ana ngā hapu o Aotearoa, i te ripohanga ō ngā ture Pākeha i tērā wā, e pakō tonu ana i te hinengaro, i te wairua, i te whatumanawa o te Māori. Nō reira, ko tēnei rangahau, he tātari, he wetewete, he whakaaroaro, ki ngā ture e here nei i ngā mahi whakatipu tamariki a te Kōhanga Reo.