Ko te kaupapa matua o taku tuhingaroa, arā, ko ngā apakura o Te Aitanga ā Materoa, Te Whānau ā-Rakairoa, Te Aowera, hapū o Ngāti Porou, Te Tāirāwhiti.
He tū momo mōteatea ā, he tū momo waiata tangi. I waiatatia ēnei tatangi apakura e ōku tīpuna ki rō wharemate hōrapa i ōku hapū. He tikanga tō ōku hapū ēnei tatangi apakura ā, he hū rerehua, he hū ataahua ā, he hū hanga rereke ki ērā atu o ngā mōteatea a kui mā, a koro mā. Kei te kaha tonu ēnei whakapaparanga ki te hāpai i ēnei tikanga i tuku iho rātau ki a mātau. Rokohanga, he reo kua ngaro ngaro haere i ēnei wā ā, kua mimiti haere te puna pakeke e mōhio ana ki te ia o te apakura, otirā ki ēnei tū momo mōteatea me ōna tikanga.
Otiia, i tērā rautau, i te wā i timata ai a Tā Apirana Ngata ki te whakawhaiti, ki te whakakaokao i ngā mōteatea o Aotearoa horapa mō āna pukapuka, kāre ōku pakeke i tukuna ēnei waiata hei tākoha ki te motu. E ai ki ngā kōrero a ōku pakeke, he mea tuku iho mō ngā uri whakatipu o Te Aitanga ā-Materoa, Te Whānau ā Rakairoa, Te Aowera hoki. Ināianei, ki ōku whakaaro kua tae ki te wā me ruku, me ketuketu, me arohaehae, me rangahau ēnei tū momo mōteatea kia kore e ngaro, kia mau tonu mātau ki te mauri o ēnei tatangi apakura i tuku iho, i tuku iho. Kāre i kō atu, kāre i kō mai. Ko au tonu tētahi o ngā tamariki whakatipungia ki rō pā, whai haere i ngā tapuae o ōku pakeke, takahia te whenua o ōku hapū, akoako haere i ngā mōteatea, i ngā waiata motuhake, i ngā kōrero tuku iho o ōku hapū. Hei reira ka puāwai taku ao i waenganui i te mātotorutanga, i te mahanatanga o tō mātau mōhiotanga ki ngā taiao katoa o Te Aitanga ā Materoa, Te Whanau a Rakairoa me Te Aowera hoki. Ka aroha atu, ka pouri atu, ka whakapau kaha au ki te hāpai, ki te tuku i ēnei kōrero hei tāpiritanga ki ngā kōrero tuku e hāngai pū ana ki ngā mōteatea, otirā hei tikanga ora mā mātau. Koinā kē te hao o tāku ake kaupapa.