Kua tupu hakaritorito te Kaitiakitanga ki te karamatamata o te pā kōrari o Hokianga whenua, Hokianga tangata, a Hokianga-hakapau-karakia. Koia ko te pū, ko te iho, ko te rito o tō mātou ahurea, ka mutu ko tō mātou taurahere e here nei i a mātou ki a Papatūānuku te paparahi e takoto nei, kia Ranginui te tuanui e tū iho nei. Ko te taurahere e here nei i a mātou te ira tangata ki a rāua he toto, he paru, he oneone, he uku, kāti ake ko te hakapapa. Hoinō ko mātou e meatia ki taua taurahere, ka meatia ki a mātou anō.
Ko tā te kuare mahi he momotu i taua taurahere kia pākarukaru i te hononga hakapapa, i te hononga wairua, hēnā ka timata ai ko ngā tikanga te memeha tai atu, te puna mātauranga te mimiti tai kume, nā kua pāhemōtia te kaitiakitanga i te ao hou nei. Hoi, i naini tata nei, kua tata ngaro atu, ka hua ko tētahi hakatupuranga e tata ngaro nei, tētahi hakatupuranga e noho kūareare nei.